Soratra nanelingelina ny masoko tany Dago

Nampidirin'i radotiana | 16 Nov, 2007

Tsy voaisako intsony hoe impiry aho no nandalo sady namaky ity sora-baventy iray ity izay ho hitanao amin'iny lalam-pirenena faha fito mandeha mianantsimo iny. Eo antampon-kavoana mahatazana mialoha ilay fidinana miolikolika hamonjy an'Alakamisy-Ambohimaha no misy azy raha tsy diso ny fitadidiako.

Inoako fa maro ny mpizaha tany miteny anglisy mandalo eo mamaky azy ity toa ahy.

 Rehefa nataoko ny fandinihina maimaika dia ny teny malagasy hoe "Toerana fakan-drivotra/fialan-tsasatra" no nadika ara-bakiteny eto.

Raha tsy mahadiso dia mba te hanolotra soson-kevitra ny tompon'andraikitra tamin'ny fanamboarana azy io aho hoe  "REST AREA" no dikan-teny manakaiky ny marina eto.

Ao Ambositra no misy ity anakiray ity. Anisan'ny toerana fandriam-bahiny milay ao raha ny hevitro manokana no lazaina. Tsotra nefa mihaja sady mampiseho ny mampiavaka ny faritra Ambositra ny haingo ao anatin'ireo efitrano.

Efa tonga taty andafy mijery ny sary nalaiko aho vao gaga fa hay ilay toerana natoriako ity manao dokam-barotra nanelingelina ny masoko ity. :-)

Ilay " Bonne route" nadika hoe "GOOD TRAVEL" no mba tiako anolorana soson-kevitra hosoloina hoe " HAVE A SAFE TRIP" farafaharatsiny.

Hay moa misy adiresy email ry zareo...  

VITA TOMPOKO


28 Hevitra & 0 Verindrohy (trackback) amin\'ny "Soratra nanelingelina ny masoko tany Dago"

  1. Ny volana Desambra 2006 aho nandalo tao amin'io hotely io. Izay fiovany tao anatin'ny iray taona no tsy haiko.

    Nampidirin'i radotiana 16 Nov 2007, 15:10
  2. Efa nanoratako email ry zareo. Inoako fa ho raisiny ho fanankianana omban-damina ny ahy fa tsy fanankianana be fahatany :-)

    Nampidirin'i radotiana 16 Nov 2007, 15:16
  3. Be ny toy itony eto Dago.
    Mety mihitsy ny nataonao. Enga anie ka tsy ho be marenina ry zareo. Mampi-te haka loko dia takosenina e ?

    Nampidirin'i Tsikisariaka 16 Nov 2007, 17:38
  4. toy ny kavim-barahina izy izany, tsy hampihaingo fa handrovi-tsofina.
    Enga anie tsy very hanjavona hoatran'ny tsifotry ny mpifana ny mail-nao ry rado.

    Nampidirin'i ikalamako 16 Nov 2007, 17:46
  5. hahaha, mampihomehy mampalahelo koa izy izany.

    Ilay place of break no tena mampihomehy!
    izy aza moa efa niezaka nanisy teny anglisy fa soa fa misy Rado manoro hevitra azy,

    Hita ihany hoe tsy mbola ni-voyage na tsy nandalina lalina ry zareo fa dia nadika fotsiny izay teo.

    Nampidirin'i ikalakely 16 Nov 2007, 18:13
  6. Mipetraka antragno mahita jofo! hozy Jaojoby zay.
    Misaotra Rado nanome tips a.

    Nampidirin'i soanja 16 Nov 2007, 18:55
  7. Ikalamako:
    Milay be ilay oham-pitenenana nampiasainao. Mbola tsy naheno an'ireo mihitsy aho an.

    Ilay hoe "...tsifotry ny mpifana" no mampihomehy ny mieritreritra azy. Hay moa izany izy io :-)

    Nampidirin'i radotiana 16 Nov 2007, 19:59
  8. Ikalakely:
    Ilain'ireo tompon'andraiki-panjakana any Dago ireo mihitsy ilay mba mijery zava-misy any amin'ny firenena hafa mba hakany sopapa amin'izay mety azo ampiharina any amintsika e. Asa na azo ampiasaina eto ny fiteny lamaody ankehitriny hoe mba atao "manara-penitra iraisam-pirenena".

    Nampidirin'i radotiana 16 Nov 2007, 20:09
  9. Soanja:
    Tena mba ampireheto kely ny jiro hitondra hazavana amin'ilay hoe "...mahita jofo" ry Soanja fa maizina be izy izany :-)

    Ny tips indray omena maimaimpoana amin'ny fomba malalaka mihitsy kah. Izay ny ahy no anjara birikiko amin'izy ity :-)

    Nampidirin'i radotiana 16 Nov 2007, 20:15
  10. Tsikisariaka:
    Izay lazainao izay mihitsy no tiako hatao tamin'ny vao nahita azy voalohany:-) Aleo ary maintimainty fotsiny no avela eo.

    Ny dikan-teny anglisy amin'ireny taratasy fenoina rehefa hipetraka amin'ny hotel any Dago ireny koa anie ka tena misy tsy miteny mihitsy e. Mety lasitra iray angamba no ampiasain'izy rehetra.

    Nampidirin'i radotiana 16 Nov 2007, 20:22
  11. rado : jofo = lavenona
    ka raha mandehandeha ianao dia mahita raha, dia mba mianatra izay fanaon'ny olona,
    fa raha mitoetra an-trano fotsiny ianao dia jofo ihany no hitanao maraina sy hariva ao - ny lavenona eo am-patanao - fa tsy mba misy zava-baovao.

    izay no mahatonga io fiteny any avaratra ka nataon'i Jaojoby hira io hoe "mandehandeha mahita raha e, mitoetra an-trano mahita jofo o"

    Nampidirin'i ikalamako 18 Nov 2007, 18:43
  12. Ikalamako:
    Misaotra betsaka fa tena mazava tsara ny heviny. Mankasitraka.

    Nampidirin'i radotiana 18 Nov 2007, 20:37
  13. Mahery koa r'ikalamako amin'ny oha-pitenenana. Efa ho mpikabary atsy ho atsy ! mankalaza e !

    Io hadisoana io tsy amin'ireny ihany fa feno eto e ! ary tena be marenina ry zareo. Tena mahatezitra ilay izy fa tsy mampihomehy intsony. Na any amin'ny gazety sy télé aza dia feno an'ireny e ! Tsy diso tsipelina akory fa tena hadisoana ankitsirano amin'ilay "izay tiako ihany io !"

    Nampidirin'i Tsikisariaka 19 Nov 2007, 15:50
  14. Tsy any Gasikara ihany no feno an'ireny. Tokony hanatona olona mahay tsara an'ilay fiteny vao mametraka takelaby sy manonta taratasy fa tsy mampihomehy intsony fa mahasosotra.

    Tsy manam-potoana hitanterana ny hita teny am-pandehandehanana aho, fa ity no hitako farany, teny an-dalana mankany Montréal:

    Hoy ilay takelaby anglisy hoe : Two-Way Traffic Ahead

    Dia hoy ilay takelaby frantsay hoe:
    Contresens devant.

    Nampidirin'i Su 19 Nov 2007, 17:13
  15. Miverina amin'ny teniko ery ambony aho, ho voasazy ve raha itondràna loko ireny dia takosenina fa diso tsinona ? satria tsy hita takarina ny tena tompony no sady raha hita aza dia be marenina ko !

    Nampidirin'i Tsikisariaka 19 Nov 2007, 17:42
  16. Tsikisariaka:

    Ilay mampianatra diso ny hafa no tena hitako mampalahelo. Ohatran'ilay ao Ambositra. Misy maromaro ny takela-by na vato misy an'io soratra "Good Travel" io. Enga anie mba hisy afaka hanome ohatra tsara.

    Nampidirin'i radotiana 19 Nov 2007, 18:03
  17. Su:

    Marina mihitsy ny zavatra voalazanao. Mialoha ny hanoratsoratana zavatra ho vakian'ny be sy ny maro tokony mba misahirana kely ny tompon'andraikitra. Manjary mianatra zavatra diso ny mpandalo eo

    Nampidirin'i radotiana 19 Nov 2007, 18:08
  18. Hono hoy aho Rado? Inona avy hono no misy amin'io toerana fakana sasatra io? Misy kabone koa ve ao sa de sakafo fotsiny sns sa ianao tsy nijanona fa nanohy?
    Misaotra.

    Nampidirin'i soanja 20 Nov 2007, 09:33
  19. Soanja:
    Toerana fitazatazanana fotsiny izy io raha tsy diso ny fitadidiako. Ohatran'ny efa manangasanga any ho any ny "Rest Area" misy toerana fivoahana any amin'ny faritra sasany.

    Nampidirin'i radotiana 20 Nov 2007, 10:33
  20. Misaotra anise rado mba manampy ny am hevtra hanatsarana ny aty Madagascar. Efa mba mahatsiro ny tanana de fa zv-dehibe eh

    Nampidirin'i olives 20 Nov 2007, 16:01
  21. Olives:
    Tsy misy isaorana ny amin'iny kah. Izay hahatsara ny hoavin'i Dago no tanjona. Mba tsy mianatra teny diso ny olona sady mba tsy ihomehezan'ny vahiny isika tompon-tany.

    Nampidirin'i radotiana 20 Nov 2007, 18:01
  22. Ka izy anie mihevitra fa raitra any an-tanin'ny jamba e ! dia lasa mampianatra diso tokoa, kanefa dia ny mpizahan-tany sy ny mpandalo no mahatsikaritra ilay fahadisoana. Izay no hanaovako hoe mila finiavana ilay izy. Finiavan'izay mahita mba manitsy amin'ny alalan'ny firesahana amin'ny tompon-kevitra na koa finiavana hanitsy an-kitsirano ny diso !

    Nampidirin'i Tsikisariaka 22 Nov 2007, 23:16
  23. Tsikisariaka:
    Izay tompon'andraikitra azo torona hevitra avy hatrany aloha d'efa nohezahina ny nanoro azy.

    Misy ny olona sarotiny ka na manana ny marina aza ianao ohatra sarotra ny tonga dia hanitsy ankitsirano ny zavatra ataon'olona.

    Nampidirin'i radotiana 23 Nov 2007, 09:55
  24. hay ve efa natonina ny tompon'andraikitra e ?
    mafy loha amin'ilay "izay tiako ihany io ?"
    Dia ahoana valiana amin'ny "zaho hiraharaha" izany ?

    Nampidirin'i Tsikisariaka 24 Nov 2007, 20:54
  25. Tsikisariaka:
    Ilay ao amin'ny hotely ao Ambositra ihany no efa nanoratana kah. Ilay Place of Brake indray tsy hitako hoe iza no tokony ho resahina. Mila manontany any amin'ny biraom-paritry ny asa vaventy any Fianarantsoa angamba?

    Nampidirin'i radotiana 25 Nov 2007, 07:59
  26. bô korazy ary e ! aleo mintsiny za tsy handéndé any fa manjary takoseniko eo !!!! kony ô ?
    aleo aloha handeha milamina ny fifanakalozan-kevitra.

    Nampidirin'i Tsikisariaka 25 Nov 2007, 19:29
  27. Tsikisariaka:
    Raha hitanao izany ilay soratra tonga de notirifinao tamin'ny baomba mainty :-)

    Efa nieritreritra an'izay ihany aho fa tsy sahy :-)

    Nampidirin'i radotiana 26 Nov 2007, 19:46
  28. Raha mandeha fiara mitokana dia vonona be aho fa raha taxi-brousse mbola hifampitady amin'ny "olombelo-tsy akoho" aloha sy ny sakana mety hataon'ny mpiray fiara e !

    "Déformation professionnelle" koa ny ahy nefa hitako fa tsy ratsy satria izaho dia tsy misalasala ny manitsy izay diso tsipelina amin'ny taratasy rehetra mandalo eto ambany masoko mainka fa soratra mivandravandra takatry ny tànako ?

    Nampidirin'i Tsikisariaka 30 Nov 2007, 15:42